‘ಪಯಣ್’ ಕೊಂಕಣಿ ಫಿಲ್ಮಾಚೆಂ ಟ್ರೈಲರ್ ಆನಿ ಆಡಿಯೊ ಮೊಕ್ಳಿಕ್

ಮಂಗ್ಳುರ್: ʻಸಂಗೀತ್ ಘರ್ʼ ಬ್ಯಾನರಾಖಾಲ್ ತಯಾರ್ ಜಾಂವ್ಚೆಂ ಯೊಡೆಲಿಂಗ್ ಕಿಂಗ್ ಮೆಲ್ವಿನ್‍ ಪೆರಿಸ್ ಆನಿ ನಿರ್ದೇಶಕ್ ಜೋಯಲ್ ಪಿರೇರಾ ಹಾಂಚೆಂ ಫಿಲ್ಮ್ ‘ಪಯಣ್’ ಮೊಕ್ಳಿಕೆಕ್ ತಯಾರ್ ಜಾಲಾಂ. ಹ್ಯಾ ಫಿಲ್ಮಾಚೆಂ ಟ್ರೈಲರ್ ಆನಿ ಆಡಿಯೊ ಅಗೊಸ್ತ್ 18ವೆರ್ ಭಾರತ್ ಮೊಲಾಂತ್ಲ್ಯಾ ಭಾರತ್ ಸಿನೆಮಾಂತ್ ಮೊಕ್ಳಿಕ್ ಜಾಲೆಂ. ಜಿಣ್ಯೆಚ್ಯಾ ಜಯ್ತಾಕ್ ಫಕತ್ ಸಂಗೀತ್ ಮಾತ್ರ್ ನ್ಹಯ್, ತಾಚ್ಯಾಕೀ ವಿಶೇಸ್ ಕಾಂಯ್‌ ಜಾಯ್ ಮ್ಹಳ್ಳೊ ಸಂದೇಶ್ ಆಟಾಪುನ್ ಆಸ್ಚೆಂ ʻಪಯಣ್ʼ ಸಸ್ಪೆನ್ಸ್ ತಶೆಂಚ್ 13 ಪದಾಂ ಆಟಾಪುನ್ ಆಸ್ಚೆಂ ಏಕ್ ವಿಶಿಷ್ಟ್ ಕೊಂಕ್ಣಿ ಫಿಲ್ಮ್. ಹ್ಯಾ ಫಿಲ್ಮಾಚೊ ಆಡಿಯೊ Spotify, Apple Music, iTunes, Amazon, Pandora, Deezer, Tidal, iHeartRadio, Claro Música, Saavn, Boomplay, Anghami, NetEase, Tencent, Qobuz, Joox, Kuack Media, Adaptr, Flo, MediaNet ಜಾಳಿಜಾಗ್ಯಾಂನಿ ಮೆಳ್ತಾ. ‘ಪಯಣ್’ ಸಿನಿಮಾ ಸಪ್ಟೆಂಬರ್ 20 ತಾರಿಕೆರ್ ಮೊಕ್ಳಿಕ್ ಜಾತೆಲೆಂ.

 ‘ಪಯಣ್’ ಸಿನಿಮಾಚೆಂ ಟ್ರೈಲರ್ ಆನಿ ಆಡಿಯೊ ʻದಾಯ್ಜಿವರ್ಲ್ಡ್ʼ ಸಮೂಹ್ ಮಾಧ್ಯಮಾಚೊ ಸ್ಥಾಪಕ್ ಚಲನ್ಚಿತ್ರ್ ನಟ್ ವಾಲ್ಟರ್ ನಂದಳಿಕೆ ಹಾಣೆ ಮೊಕ್ಳಿಕ್ ಕೆಲೆಂ. ʻಕೊಂಕಣಿ ನಾಟಕ್ ಸಭಾʼ ಹಾಚೊ ಅಧ್ಯಕ್ಷ್ ಮಾ| ಬಾ| ರೊಕಿ ಡಿʼಕುನ್ಹಾನ್ ಆಶೀರ್ವಚನ್ ಕೆಲೆಂ.

ಟ್ರೈಲರ್ ಮೊಕ್ಳಿಕ್ ಕರ್ನ್ ಉಲಯಿಲ್ಲೊ ವಾಲ್ಟರ್ ನಂದಳಿಕೆ, ‘ಸಿನಿಮಾಚೆಂ ಟ್ರೈಲರ್ ಭೋವ್ಚ್ ಉತ್ತೀಮ್ ರಿತಿನ್ ತಯಾರ್ ಜಾಲಾಂ. ಹ್ಯಾ ಸಿನಿಮಾಂತ್ ಸಸ್ಪೆನ್ಸ್ ಸವೆಂ ಬರೊ ಏಕ್ ಸಂದೇಶ್‌ಯಿ ಆಟಾಪುನ್ ಆಸೊನ್ ಕೊಂಕ್ಣಿ ಸಿನಿಮಾ ಶೆತಾಂತ್ ಹೆಂ ಫಿಲ್ಮ್ ಏಕ್ ಮಯ್ಲಾ ಫಾತೊರ್ ಜಾತೆಲೆಂ. ಸರ್ವಾಂನಿ ತೆಂ ಪಳೆವ್ನ್ ಪ್ರೋತ್ಸಾಹ್ ದೀಜೆ” ಮ್ಹಣ್ ಉಲೊ ದಿಲೊ.

ʻಪಯಣ್ʼ ಫಿಲ್ಮಾಂತ್ ಬ್ರಾಯಾನ್ ಸಿಕ್ವೇರಾ, ಜಾಸ್ಮಿನ್ ಡಿಸೋಜಾ,  ಕೇಟ್ ಪಿರೇರಾ, ಶೈನಾ ಡಿಸೋಜಾ, ರೈನೆಲ್ ಸಿಕ್ವೇರಾ, ಲೆಸ್ಲಿ ರೆಗೊ, ಜೆರಿ ರಸ್ಕಿನ್ಹಾ, ವಾಲ್ಟರ್ ನಂದಲಿಕೆ, ಆಲ್ಬರ್ಟ್ ಪೆರಿಸ್, ಜೀವನ್ ವಾಸ್, ಮೆಲಿಶಾ ಪಿಂಟೊ ಆನಿ ಜೋಸ್ಸಿ ರೆಗೊ ಮುಖೆಲ್ ಪಾತ್ರಾಂತ್ ಆಸಾತ್. ತಾಂತ್ರಿಕ ಸಿಬ್ಬಂದಿ: ನಿರ್ದೇಶನ್ ಆನಿ ಕಾಣಿ: ಜೊಯೆಲ್ ಪಿರೇರ್, ಪರಿಕಲ್ಪನ್ ಆನಿ ಸಾಹಿತ್ಯ್: ಮೆಲ್ವಿನ್ ಪೆರಿಸ್; ಛಾಯಾಗ್ರಹಣ್: ವಿ ರಾಮಾಂಜನೇಯ; ಸಂಕಲನ್ ಆನಿ ಸಹ-ನಿರ್ದೇಶನ್: ಮೆವಿಲ್ ಜೋಯಲ್ ಪಿಂಟೊ; ಸಂಗೀತ್: ರೋಶನ್ ಡಿʼಸೋಜ, ಆಂಜೆಲೊರ್; ನಿರ್ಮಾಪಕಿ: ನೀಟಾ ಜೋನ್ ಪೆರಿಸ್.