ಕೊಂಕಣಿ ಸಬ್ದ್’ಕೋಶ್’ಕಾರ್ ಆಂಜೆಲೊ ಮಾಫೆಯಿಚೆರ್ ‘ಸಾಹಿತ್ಯ್ ಮಂಚ್’
ಮಂಗ್ಳುರ್: ಕಾನಡಿ ಕೊಂಕ್ಣೆಂತ್ಲೊ ಪಯ್ಲೊ ಸಬ್ದ್’ಕೋಶ್ ತಯಾರ್ ಕರ್ಪಿ ಫಾ| ಆಂಜೆಲೊ ಎಫ್. ಎಕ್ಸ್. ಮಾಫೆಯಿ ಹಾಂಚ್ಯಾ ಜಿವಿತ್ ಆನಿ ವಾವ್ರಾವಿಶಿಂ ರಾಷ್ಟ್ರ್ ಮಟ್ಟಾಚೆಂ ‘ಸಾಹಿತ್ಯ್ ಮಂಚ್’ ಕಾರ್ಯೆಂ ಅಗೊಸ್ತ್ 30ವೆರ್ ಸಾಂ ಲುವಿಸ್ ಪರಿಗಣಿತ್ ವಿಶ್ವ್’ವಿದ್ಯಾಲಯ್ ಸಹೋದಯ ಸಭಾಸಲಾಂತ್ ಚಲ್ಲೆಂ. ಸಾಹಿತ್ಯ್ ಅಕಾಡೆಮಿ ನ್ಯೂ ಡೆಲ್ಲಿ ಆನಿ ಸಾಂ ಲುವಿಸ್ ಪರಿಗಣಿತ್ ವಿಶ್ವ್ ವಿದ್ಯಾಲಯ್ ಕೊಂಕಣಿ ಸಂಸ್ಥೊ ಹಾಂಚ್ಯಾ ಜೋಡ್ ಆಸ್ರ್ಯಾಖಾಲ್ ಚಲ್ಲೆಲ್ಯಾ ಹ್ಯಾ ವಿಚಾರ್ ಸಾತ್ಯಾಚೆಂ ಉಗ್ತಾವಣ್ ಇಟಾಲಿಯನ್, ಸ್ಪ್ಯಾನಿಶ್, ಫ್ರೆಂಚ್, ಜರ್ಮನ್, ಕನ್ನಡ ಆನಿ ಕೊಂಕ್ಣಿ ಭಾಶೆ ಪಂಡಿತ್ ದೊ| ಫಾ| ಜೆರೋಮ್ ಡಿ’ಸೋಜಾ ಹಾಣಿಂ ಕೆಲೆ.
ಕಾರ್ಯಾಚ್ಯಾ ಸುರ್ವೆರ್ ಸಾಂ ಲುವಿಸ್ ಕೊಲೆಜ್ (ಸ್ವಾಯತ್ತ್) ಹಾಚೊ ರೆಜಿಸ್ಟಾರ್ ದೊ| ಆಲ್ವಿನ್ ಡೆ’ಸಾ ಹಾಣಿಂ ಸರ್ವಾಂಕ್ ಬರೊ ಯೆವ್ಕಾರ್ ಮಾಗ್ಲೊ. ಉಪ್ರಾಂತ್ ಸಾಹಿತ್ಯ್ ಅಕಾಡೆಮಿ ಕೊಂಕಣಿ ಸಲಹಾ ಸಮಿತಿಚೊ ನಿಮಂತ್ರಕ್, ಮೆಲ್ವಿನ್ ರೊಡ್ರಿಗಸ್ ಹಾಣೆಂ ಪ್ರಾಸ್ತವಿಕ್ ಉಲವ್ಪ್ ದಿಲೆಂ. ಉಪ್ರಾಂತ್ ಚಲ್ಲೆಲ್ಯಾ ವಿಚಾರ್ ಸಾತ್ಯಾಚೆಂ ಸುಂಕಾಣ್ ಹಾತಿಂ ಘೆತ್’ಲ್ಲ್ಯಾ ದೊ| ಫಾ| ಮೆಲ್ವಿನ್ ಪಿಂಟೊ ಹಾಣಿಂ ಫಾ| ಎ. ಎಫ್. ಎಕ್ಸ್. ಮಾಫೆಯಿಚಿ ಮಟ್ವಿ ಒಳೊಕ್ ಆನಿ ತಾಚ್ಯಾ ವಾವ್ರಾಚಿ ಝಳಕ್ ದಿಲಿ. ಮಾಫೆಯಿಚೆಂ ಜಿವಿತ್ ಆನಿ ವಾವ್ರ್ ಹ್ಯಾ ವಿಶಿಂ ಫಾ| ಒಲ್ವಿನ್ ವೇಗಸ್ ಜೆ.ಸ., ಕೋಶ್’ಕಾರ್ ಜಾವ್ನ್ ಮಾಫೆಯಿ ಮ್ಹಳ್ಳ್ಯಾ ವಿಶಯಚೆರ್ ದೊ| ಫಾ| ಜೆರೊಮ್ ಡಿ’ಸೋಜಾ ಆನಿ ವ್ಯಾಕರಣ್’ಕಾರ್ ಜಾವ್ನ್ ಮಾಫೆಯಿ ವಿಶಯಾಚೆರ್ ಫಾ| ಜೆಸನ್ ಪಿಂಟೊ ಎಸ್.ಡಿ.ಬಿ. ಹಾಣಿಂ ಪ್ರಬಂಧ್ ಮಂಡನ್ ಕೆಲೆಂ.
ಕಾರ್ಯಾಚ್ಯಾ ಸುರ್ವೆರ್ ಕೊಂಕ್ಣಿ ಸಂಘಚ್ಯಾ ಸಾಂದ್ಯಾಂನಿ ಪ್ರಾರ್ಥನ್ ಗೀತ್ ಗಾಯ್ಲೆಂ. ಕೊಂಕಣಿ ಸಂಸ್ಥ್ಯಾಚಿ ಸಹಾಯಕಿ ಕು| ಡೆಲ್ವಿಟಾ ವೇಗಸಾನ್ ಕಾರ್ಯೆಂ ಚಲಯ್ಲೆಂ. ಸಾಂ ಲುವಿಸ್ ಪರಿಗಣಿತ್ ವಿಶ್ವ್’ವಿದ್ಯಾಲಯಾಚ್ಯಾ ಕೊಂಕ್ಣಿ ವಿಭಾಗಾಚಿ ಮುಖ್ಯಸ್ತಿಣ್ ಶ್ರೀಮತಿ ಫ್ಲೋರಾ ಕ್ಯಾಸ್ತೆಲಿನೊ ಹಿಣೆ ಧನ್ಯವಾದ್ ಪಾಟಯ್ಲೆಂ. ವಿವಿಧ್ ಕೊಲೆಜ್ ವಿದ್ಯಾರ್ಥಿ ತಶೆಂಚ್ ವಿಂಚ್ಣಾರ್ ಬರವ್ಪ್ಯಾಂನಿ ಹ್ಯಾ ವಿಚಾರ್ ಸಾತ್ಯಾಂತ್ ವಾಂಟೊ ಘೆತ್ಲೊ.
